الو
ايوة يا طنط حشرية
طنط في عينك .مين اللي بيتكلم
انا اسمي ناني عروسة جديدة من شهرين بس يا طنط حشرية
عرسة لما تلوشك يا بت انتي . بطلي تقولي طنط لحسن هقطع الخط
حاضر يا طنط أأأ قصدي حاضر يا مدام حشرية
ايوة كدة احبك . انما تصغري روحك وتكبريني مش هيحصلك طيب . خير يا ست ناني
انا متصلة بيكي عشان اشتكيلك من هاني
هاني مين
هاني جوزي
ماله
مش بيخليني اروح عند مامي
ومش عايز يوديكي عند امك ليه يختي
تصوري يا مدام حشرية بيقولي تروحي عند مامتك مرة واحدة في الاسبوع
طب وايه يعني يا بت انتي
ازاي بقى . انا مااقدرش استغنى عن مامي خالص ولازم اشوفها كل يوم
يا شيخة اتقي الله في الراجل . يعني هو متجوزك عشان تهجي من البيت كل يوم وتروحي عند المحروسة امك ولا عشان تعيشيه في استقرار وسعادة وهنا
يعني انتي عايزاني ما ازورش مامي يا مدام حشرية .لا انا مااقدرش بصراحة على بعد مامي
ولما انتي يختي مش قادرة على بعد امك كنتي بتتجوزي وتسبيها ليه .ماكنتي اتنيلي خليكي قاعدة جنبها خليها تديكي الراضعة وتغيرك البامبرز
كدة انتي بتتريئي علية وعلى مامي طيب ماااااااااااااااااااااااااااااااااشي انا مخصماكي ومش هتفرج ع النشرة تاني
دي حاجة تسعدني يا عار المشاهدين يا دلوعة مامي . اقطعوا الخط
ال الواحدة تبقى هتتهبل ونفسها تتجوز وامها تلف بيها ع المشايخ عشان النحس يتفك وتلاقي راجل يعبرها . وتبقى مش طايقة امها اصلا ونفسها تفارقها بالمعروف
ولما تتجوز وتلاقي بيت يلمها بدل ما تبوس ايد الراجل اللي خلاها ست وليها بيت كل يوم عايزة تهج عند امها وتسيب الراجل . خلاص امها احلوت دلوقتي وبقت توحشها
ستات اخر زمن . فاصل ونواصل خليكو قاعدين ولا اقولكو روحوا وتعالوا بكرة عشان لسة هقوم اغسل رجلي بالحجر .
مدونة هبة نور 