عودة للخبر بتاع أمينة ام ايد طاهرة اللي جوزها افشها بتنضف جيوبه
معانا على الهاتف أمينة أم ايد طاهرة
الو ازيك يا ست امينة
مساء الفل يا حلاوة
حلاوة ! مساء النور يا معلمة امينة . ايه يختي العمايل السودة اللي بتعمليها دي مش عيب كدة
هو ايه اللي عيب عدم الا مؤاخذة هو انا سرقت حد غريب . انا سرقت راجلي وابو عيالي
يا ست عيب كدة الراجل مآمنك على ماله
جرا ايه يا حلاوة هو انا سرقت الفلوس عشان اصرفها
امال سرقتيها ليه يا ام ايد طويلة
عشان احوشها واشيلها في الحفظ والصون
طب ما قولتليش جوزك لما أفشك عملتي ايه
اسكتي يا شيخة دا طلع راجل مش ولا بد . الراجل عمل نفسه نايم وبعدين شافني وانا بشيلهوم في الدولاب
وخلاني خرجت من الاوضة وراح لامم تحويشة العمر وخباها . لأ وببجاحته بيتهمني بالسرقة . طب انا راضية ذمتك يا حلاوة
مين فينا اللي حرامي أنا ولا هو
يا ولية انتي بتستعبطي . دي فلوسه وشقاه
فلوسه ازاي يا حلاوة اذا كان اتسحب وخدهم من دولابي الحرامي
لا دانتي يتفاتلك بلاد . طب وعملتي ايه
روحت عملتله محضر في القسم وجم خدوه وبيحققوا معاه
يعني سرقتي الراجل ولبستيه تهمة كمان .يلا يا حرامية
أهو انتي اللي حرامية
أنا حرامية برضو . انا حشرية الرخمة يتقالها يا حرامية
ايوة حرامية والعقد اللي انتي لابساه ده بتاعي
يالهوي اقطعوا الخط دي هتلبسني مصيبة انا كمان
فاصل ونواصل بلاوي الستات
مدونة هبة نور 