قناة مكسورين الجناح
معاكو حشرية الرخمة وعودة مجددا الى نشرتنا
عودة للخبر بتاع الاستاذ معقد ابو حواجب مقلوبة اللي رجع من شغله واستنكار من مراته مدام انشكاح
معانا ع التليفون مدام انشكاح
الو ايوة يا مدام انشكاح
اهلا ياست حشرية ازيك
الله يخليكي ياحبيبتي
والله انا بحبك اوي ومتابعة النشرة على طول
كتر الف خيرك يا حبيبتي . احكيلي على اللي حصل من جوزك الاستاذ معقد
الراجل يختي داخل خارج مبوز بسبب ومن غير سبب
ازاي يا مدام انشكاح . مافيش حاجة من غير سبب
ياحبيبتي زي مابقولك كدة . هو بعيد عنك معقد اسم على مسمى
طيب ما تعمليله تحليل هرمونات يختي
وماله يختي اعمله
لكن قوليلي بصراحة هو انتي بتقابليه ازاي
بقابله ازاي يعني ايه
يعني بتبتسمي في وشه كدة وتكوني حاطة برفان حلو ولابسة حاجة حلوة واول ماتشوفيه تتشعلقي في رقبته وتقوليله وحشتني
جرا ايه يا مدام حشرية .ايه الكلام اللي يدعو الى الرزيلة ده .انتي عايزة جوزي يقول عليه اهلي ماعرفوش يربوني ولا ايه
انا بقابله رسمي بجلابية طويلة محترمة بكمام طويلة محترمة برضو وروح قايلاله خش غير هدومك على مااحط الاكل ع الطرابيزة يا معقد
يا شيخة ا تقي الله .وكمان مش عايزاه يتعقد ويقلب حواجبه . طيب وايه اللي عملتيه اخر مرة عشان كدة اخباركو وصلتلنا
ابدا يختي انفجرت فيه . هو داخل من هنا وعمال يشخط وينطر روحت مدياهومله في جنابه وقولتله بعلو صوتي جرا ايه ياراجل انت مالك قالب وشك علينا ليه هو احنا ناقصين خنقة
هو يقولي انا ارفان من الدنيا وانا اقوله وانا ارفانة اكتر منك ياخويا مش انت بس اللي ارفان
طب بالله عليكي ده حوار بين راجل ومراته
ياسلام يختي امال عايزاه يكشر في وشي وانا اضحك في وشه ولا ايه . العين بالعين والسن بالسن والبادي اظلم
على فكرة يختي انتي اللي غلطانة
وانتي مالك انتي غلطانة ولا مش غلطانة انتي هتعلميني الادب ولا ايه
اعلمهولك واعلمه للي يتشددلك واقفلي السكة يا مرات المعقد
*
وبعد ما قفلنا مع الست دي داهية لاترجعها تاني ناخد فاصل ونعود اليكم بموجز الانباء
استنيني يختي انتي وهي
على فكرة اللي ماعلقوش انا عارفاهم وهجيبهم نفرايا نفرايا ونعلقهم من رموشهم
مدونة هبة نور 